ދިވެހިރާއްޖޭ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ޤާނޫނުގެ 3 ވަނަ މާއްދާގެ (ރ) ގައިވާ ގޮތުގެމަތިން ހައްދުންމަތީ އަތޮޅު ކައުންސިލުން ޖަވާބުދާރީވެ ރިޕޯޓް ކުރާ ރަސްމީ ފަރާތަކީ ލޯކަލް ގަވަރުމަންޓް އޮތޯރިޓީއެވެ. އަދި މީގެ އިތުރުން އެ މާއްދާގެ (ބ) ގައިވާ ގޮތުގެމަތިން އިދާރީ ދާއިރާގެ ރައްޔިތުންނަށް ޖަވާބްދާރީވެއެވެ.

މިއިދާރާގެ ކޮންމެ މުވައްޒަފަކީވެސް އިދާރީ ދާއިރާތައް ލާމަރުކަޒީ އުޞޫލުން ހިންގުމުގެ ޤާނޫން (7/2010)ގައި ބަޔާންކޮށްފައިވާ ގޮތުގެ މަތިން މިކައުންސިލްގެ މަސައްކަތްތައް، ސިވިލްސަރވިސް ޤާނޫނާއި، ސިވިލްސަރވިސް ޤަވާޢިދުގެ ކޯޑްއޮފް ކޮންޑަކްޓާއި އެއްގޮތްވާގޮތުގެ މަތިން ކުރުމަށް އެއްބަސްވެ ކޮންޓްރެކްޓެއްގައި ސޮއިކޮށްފައިވާ މުވައްޒަފެކެވެ.

ކޮންމެ މުވައްޒަފެއްގެ މަސްއޫލިއްޔަތުތަކާއި ޒިންމާތައް ވަޒީފާބަޔާނެއްގައި ލިޔެ، މުވައްޒަފާއި އެމުވައްޒަފެއްގެ މަސައްކަތް ސްޕަވައިޒްކުރާ ސްޕަވައިޒަރު ސޮއިކޮށް މަސައްކަތް ޙަވާލުކުރެވިފައިވެއެވެ. އަދި އެމުވައްޒަފަކާއި ޙަވާލުކުރެވިފައިވާ މަސައްކަތްތައް ބަރާބަރަށް ކުރޭތޯ ސްޕަވައިޒަރ ބަލައި، ރަނގަޅުކުރަން ޖެހޭ ކަމެއްވާނަމަ އެކަމެއްގެ އިރުޝާދު މުވައްޒަފަށް ދުވަހުން ދުވަހަށް ދެމުންގެންދެއެވެ.

މުވައްޒަފުން މަސައްކަތް ކުރާގޮތުގެ ފެންވަރު ބެލުމަށް ސިވިލްސަރވިސް ކޮމިޝަނުން ކަނޑައަޅުއްވާފައިވާ އުޞޫލްތަކާއި އެއްގޮތްވާގޮތުގެ މަތިން މުވައްޒަފުންގެ ޕަރފޯމަންސް އެޕްރައިޒަލް އަހަރަކު އެއްފަހަރު ފުރިހަމަކުރެވެއެވެ.

ދިވެހިރާއްޖޭ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ޤާނޫނުގެ 106 ވަނަ މާއްދާގެ ގައިވާ ގޮތުގެމަތިން ހައްދުންމަތީ އަތޮޅު ކައުންސިލުން ލޯކަލް ގަވަރުމަންޓް އޮތޯރިޓީއަށް ހުށަހަޅަންޖެހޭ ތިރީގައިމިވާ ލިޔުންތައް ހުށަހަޅަމުންގެންދެއެވެ.